الخدعة ... 1 - الطموح

عامة يمكن تصنيف الناس الى انسان طموح واخر غير طموح ,ولكن من هو الطموح ومن هو غير ذلك وهل الطموح افضل من ذلك غير الطموح ؟؟؟؟

فى الحقيقة يمكن القول ان الانسان الناجح فى حياته والمقبل على نجاحات اخرى هو الانسان الطموح , ولكن كيف اصبح طموح .منذ صغره ووالداه يحثانه على الدراسة والا يضيع وقته فى اللعب ومشاهدة التلفزيون رغم انه يتمنى ان يلعب مع اصدقائه الكورة او يشاهد الرسوم المتحركة لكن طموحه ان ينجح فى دراسته يجعله يترك كل مايحب فى سبيل النجاح سواء اكان الطامح رجلا او امرة يجب تكريس كل وقتى للدراسة حتى اصبح دكتور او مهندس او بطيخ امبسمر المهم حتى فى فترة الصيف يجب ان تستغلها وتقعد شاطر موش زى العيال الاخرين الى يلعبو فى الشارع شن ادير يجب انك تاخذ دورة انجليزى ولا دورة كميوتر ولا تقرا فى الجامع (على اقل تقدير ) ولا تمسك دكان ولا اى حاجة تنفع ,ممنوع اللعب ممنوع الدهوير ولا الراحة اذا كنت تبى تطلع حاجة كبيرة ,وبعدين كملنا هالدراسة الى قاعدة زى الحبل حول اعناقنا والحمد الله وتعينا فى الشغل توا نتريحو, لالا لالا انت لابد يكون عندك طموح لازم طور من نفسك فى شغلك وخارج شغلك زملائك ياخذو فى دورات ويقرو والمجال متاعك دائما فيه تحديث وكان رقدت معناها يهلبك القطار وتقعد مضحكة لازم تشتغل وتكون طموح بيش توصل لاعلى المراكز باهى نفسى نزور أقربائى و ناسى واحبابى ونهدرز مع اصحابى, ياعمى شنو هالكلام الفاضى مستقبلك اهم من الدوة الزايدة شن تبى تستفيد منها الدوة مع الناس هضوم لكن دورة ولا قرايا ولا شغل اذا ماكانش فى استفادة مادية تزيد من خبرتك العملية باهى اشتغلنا لعند امتى لعند تكون مستقبلك شقة وسيارة وزوجة ورصيد ولا ممكن تسافر تغرب موش مشكلة فى سبيل الشهادة والفلوس وطياح السعد المستقبل و بعدين اه عندك عيال لابد تربيهم كويس لازم طموحك يكون متركز على شغلك بيش تربي عيالك كويس باهى ربيتهم وقرو وشتغلو اه لازم تزوجهم وبعدين لازم تحل مشاكلهم وبعدين خلاص انا تقاعدت من الشغل والعيال تزوجو وسيبونى والناس الى كنت نحبهم وعايش معاهم راحو وانا فى السبعين من عمرى ومانحقش فى شى قدامى يالله نشوف فى العكوز ونمشى بسرعة ناقص خمسة فى الساعة ومانتحركش من الحوش الا للمستشفى شفاكم الله ,توا ممكن ناخذ راحتى ونتفرج على الرسوم المتحركة بالعيون هذى ولا ممكن ندهور فى بلاد الله ونزرد مع اصحابى بالصحة هذى ولا ممكن نقعد مع اطفالى ونلعبهم ونقضى معاهم اوقات حلوة وهم موش فاضيين اصلا طموحهم وراهم الى يقرا والى يشتغل يبى يقعد مدير, والا ممكن نقعد مع امى وباتى نشرب معاهم طاسة شاهى ونهدرزلهم على مواقف صارن معاى ونضحك معاهم بالدنيا كلها ضحكتهم, ونعطف عليهم زى ماربونى وانا صغير وينهم وانا فى السبعين

..... بصراحة الطموح هضا خدعة كبيرة يقيدنا من المهد للحد وتجد نفسك انك دائما مقيد باامور الحياة الروتينية حتى انك تحقق مبتغاك وتصل لاهدافك العلمية والمهنية وحتى الاجتماعية ومع الطموح لايوجد وقت لاشى سوى الاهداف والنجاح

وفى الوقت نفسه نرى ذلك الانسان الذى نصفه بالفاشل لانه لم يكمل دراسته ولم يحصل على وظيفة مميزة لانه لم يكن طموح من صغره فلم يصل الا ماوصل اليه النوع الاخر الا وهو الطموح الناجح من وجه نظرنا ولكن الغير طموح يملك الوقت ممكن يتفرج عالرسوم متحركة زى مايبى (نكرر فيها واجد الرسوم المتحركة اصلى هذى بالذات مقهور منها) خلينا فى صاحبنا الغير طموح الى ممكن يزرد ويدهور ويدير اى شى نفسه فيه والله انا نعرف واحد ترشقله يعدى فى الليل ياخذ لحم ويشوى بروحه فى الغابة ياعينى ياعينى مزاج وعايش حياته بالطول والعرض باهى والنتيجة حتى هو ازوج وخلف عيال وعياله خلفو اعيال وماشية الحياة وين الفرق ومن الرابح ,ماتقوليش هو ساكن فى شقة وانت ساكن فى فيلا ولا هو يلبس عربى وانت تعزق فى الطرحات ولا عويلته موش لاقيين ماياكلو وانت عويلتك ياكلو فى الكورن فليكس النتيجة الكل عايش الكل راح يموت النقاط موش فى الدنيا النقاط فى الاخرة (ان اكرمكم عند الله اتقاكم) يعنى الدكتوراة ولا المنصب متاعك نقعة واشرب ميته

اذا كان الطموح يستهلك الوقت الى هو فى الاساس موش ملكنا ملك اولادنا وملك اهلينا وملك الناس الى يعيشو معانا جيرانا واصحابنا واحبابنا ويااخى حتى لنفسك عليهك حق اذا كان الثمن شهادة معتمدة تعلقها عالحائط ولا منصب معتبر ماتحصل من وراه الا قله الربايح (كل سيد فوقه سيد) ياعمى بلاش منه الطموح, نعيش حياتى خير ولا شنو رايكم انتم نعيشو الخدعة ولا نبهو الناس الى بعدنا