Monday 23 February 2009

وجهـــــــــــــــــــــــــات نظر



فى يوم ممطر انقطع عنا الانترنت وتقطعت بنا السبل فجلسنا جميعا نحن سراج وعصام و
Motherland
نتبادل أطراف الحديث وتطرقنا لعدد من المواضيع وكنا ننتقل من موضوع إلي اخر حتى طرقنا موضوع كيفية اختيار شريك الحياة وتناقشنا وتحمسنا, تحدثنا واقفين وأيضا جلوس علت الأصوات واختلفت الآراء وتعددت, لكن لغة الحوار كانت راقية ولا تخلو من الطرافة ، كل منا حاول إبداء وجه نظره ومقارنتها بالدلائل والوقائع وتجارب شخصية حدثت معه فنحن الثلاثة معنيون بهذا الموضوع.
وقد قررنا التعاون في تدوين هذا الحوار ونشره في المدونتين

(MOTHERLAND ) و (SWEET SMILE )

حيث يكتب كل منا وجه نظرة وللقراء الأعزاء الحكم والقرار وربما كان للقراء وجه نظر أخري يشاركوننا بها من خلال تعليقاتهم التي قد تثري الموضوع .


وجهة نظر سراج في اختيار شريك الحياة


مع احترامي لوجه نظر الإخوان أنا اعتقد أن الشاب لما أيقرر الزواج والبحث عن الزوجة يدرس وضعه المادي وطبعه ويحاول يرسم الخطوط العريضة لشخصية شريكة حياته ...ويكون هدفه في الزواج هو الزواج والاستقرار مع شريكه حياة تسعده ويكون الزواج خالي من المصالح والمطامع وأنا في نظري إن الإنسان لما يختار يختار إنسانه من نفس الطبقة الاجتماعية والمادية اللي هو ايعيش فيها حتي ولو توفرت مواصفات فتاة أحلامه في طبقة أفضل منة ماديا او اجتماعيا يعني بالعربي الفصيح أيكون في تكافؤ اجتماعي ومادي والمفترض أن أيكون في تكافؤ علمي حتى أيكون في لغة حوار مشتركة وإلا راح يتعب ...وأحيانا تجد الشاب حاط مواصفات في الشكل لا يمكن أبدا إن ايقدم أي تنازلات عنها علي الرغم من أنة مرات يلاقي فتاة حلوة بس مواصفاتها اقل من اللي طالبة مثلا لون العيون أو الطوال..الخ علي الرغم من أن شخصيتها حلوة وعندها حضور ...أنا شخصيا عندي صديق يبحث ويبحث مند أربع سنوات ولم يجد إلي الآن لان كان سقف طلباته في مواصفات شريكة حياته عالي من مدة التقيت معاه وسألته عن أخباره قالي البحث مازال لكن هو طبعا قدم تنازلات حسب ما أيقول لان مواصفاته غير متوفرة مع العلم من أربع سنوات أنا نصحته أذا أردت أن تطاع اطلب ما في المستطاع ..وخطرها علي التنازلات في واحد نعرفة اقل ما انقول عنة انه غبي أجماعيا سئلاتة خطيبتة قالتلة يا حبيبي هل أنا نشبه فتاة أحلامك؟؟؟ قاللها لاوين قدمت تنازلات واجد...ههههههه يعني خليك في المعقول يا أخي أنت مش عايش في روسيا راك في ليبيا في ليبيا في ليبياااااا (بعلو الصوت)...واهو صديقي جاء لكلامي توة عموما أنا انتوقف هنا حتي أعطي مجال لغيري يحكي أنا عارف روحي لما نحكي ما نعرف نسكت لكن الموضوع هذا مازلت وراه مش امسيبة حاسس اني ما قلت اللي في خاطري.


وجهة نظر
Motherland
في اختيار شريك الحياة


نكن كل الاحترام لوجهة نظر سراج وعصام ونعتبرها نظرة منطقية ومثالية تطبق في العموم, وزى ماقلت هضا كلام كتب يطبق في اى زمان ومكان, لما واحد يأخذ وحدة نفس المستوى المادي والثقافي والاجتماعي أكيد يتفق معها بالطول والعرض, أنا مع إن الإنسان يفرض وجهة نظره (الاختلاف في الراى لايفسد للود قضية) يعنى موش مشكلة الاختلاف في المستويات الاجتماعية والثقافية و ...الخ. المهم الرغبة الحقيقية في الاتفاق والعنصر الأهم هو الرجل مع احترامي للطرف الأخر لكن حق القوامة (الغير مقبول للطرف الأخر للأسف) يعطى الرجل حق فرض نفسه (واقع يفرض نفسه) يعنى لما الإدارة تكون في المستوى كل الاختلافات في اى مستويات تتلاشى أمام إرادة المنطق النابع من الثقة ,الثقة المتمثلة في قوة الشخصية الى تأتى طبعا من خلال خبرات وتجارب ومعرفة بأمور الحياة وكل ذلك لا يتوفر ألا بوجود إرادة قوية صلبة واثقة من تحقيق الهدف مهما كانت الظروف, بالنتيجة حياة تحت السيطرة التامة (بإذن الله) سواء في مايتعلق بالحياة الزوجية أو اى مجال يحاكى حياة الإنسان,موش من الصعب إن إنسانة أمية تعيش مع دكتور ولا السفيرة عزيزة تعيش مع الاسكافي بالنتيجة رجل وامرأة مهما اختلفت الأشكال. وبالنسبة للمواصفات من حق كل إنسان أن يضع المواصفات الى تناسبه ولو تشوف المواصفات المطلوبة لكل شخص حتجد إنها في الغالب نواقص يحب الإنسان يكملها في نفسه بعد الأشياء الى مفروغ منها أصلا زى الأخلاق والبيتية, مثلا رجل يبحث عن امرأة طويلة وبيضاء ليش لان ماعنداش تلاجه نبصر لان هو قصير واسمر, ومرآة تبحث عن رجل مقتدر ماديا لأنها تحب التسوق لأنها تخاف الفقر, بيني وبينكم ضعف إيمان ان الإنسان يخاف من صفة ماديا زى المال والعمل والمركز مايدوم شي, أنا من وجهة نظري أهم شي العقل والروح بس ماتكونش شينه طبعا ,في فيلم امريكى اسمه شالو هال (هال السطحى) الى حاظر الفيلم هضا فعلا يشرح ليش أهم شي العقل والروح ,والجمال مهم طبعا لكن موش الأساس وعموما في مثل ايطالي يقول فيما معناه لما تبى تزوج خوذ مرآة شينه ليش لان السمحة بعدة فترة تشين وتكرها لكن الشينة تقعد طول حياتها شينه ماتكرهاش, عموما كلها نصيبات لكن مايمنعش إن الإنسان يجرب والعدو الأكبر هو الخوف والتردد.


وجهة نظر عصام في اختيار شريك الحياة


أحترم وجهة نظر أي شخص من المشاركين ، أنا شخص مقتنع بأن للمرأة حرية الإختيار مثل الرجل في إختيار شريك الحياة، و هده ليست قناعتي الشخصية فقط بل رأى الإسلام .ولاكن لن أتكلم على نفسى في اختيار شريكة الحياة لأن قناعاتي الشخصية هي خاصة بى فقط ولا ألزم بها أحد . بل سأشارك برأي بخصوص العموم وهدا ما أنا مقتنع به .
يجب أن يكون هنالك تكافؤ مابين الزوجين من ناحية الحالة الاجتماعية والحالة المادية وكذلك الحالة العلمية. طبعا هناك حالات خاصة .... تكبيد يعنى يا با شا ؟؟ وأنا من المقتنعين به وما تسألنيش ليش . بس الواضح تو أن البنت الفقيرة تبى واحد متريح يعنى ورق؟ وطبعا البنت الورق المتريحة تبى واحد ورق حقاتها يا خويا. والشاب الفقير المسكين راحت عليه؟
أنا مش ضد أن البنت الفقيرة يقعد عندها طموح مافيش مشكله بس ما يقعدش لازم ورق . طبعا الكلام مش على كل البنات الفقيرات. طبعا الكلام يلي نبى أنقوله ممكن واجدين يقولوا يبالغ؟ بس صدقونى هذا يلي ماشى . الفلوس عند معظم البنات هنا كل شي ويغطن على عيوب واجد آه آه ما تقوليش لا ؟ هدا الواقع . والشباب بصراحة صاير من كثرة القنوات و الفضائيات والمسلسلات أصبح يلي يبى يتزوج يقيس على الأخت هيفا والنسناسة نانسي وغيرها من الشريفات؟؟؟
وهد غلط غللللللللللللللللللللط . صاح الواحد ينوض من الصبح مايلقش قردة راقدا يلاه بس الواحد ما يبالغش في النقطة هده بالذات. وبصراحة الموضوع هدا فيه مخش لسبب واحد والله ما نبالغ. وهو ؟ إن معظم البنات طيبات القلب ورهيفات وممكن بالريق الحلو أتجيبها تلاك وترضى بأي ظرف
.

20 comments:

Nasimlibya `√ said...

توا بنقعد نعاود الرد
تاني ههههه

باهي والله فرحت طلعت صحاب انت وسراج ممتاز ربي يدوم المحبة


انشط زي صاحبك يا مذرلاند


يومك طيب

Meme said...

السلام عليكم

يا عيني يا عيني شنو هالمواضيع الناشطه؟ هذا هكي المطر اتدير؟هههههههه
شوف يا سيدي من وجهه نظري لازم يكون فيه تقارب ثقافي علمي لانه صدقني مش حيمشي الحال واحد يتكلم في الشرق و التاني في الغرب يعني كلامك يا سيد مدرلاند على انه دكتور يعيش مع اميه راااهو صعب صدقني نقولك في الكلام هدا مش من فراغ
اما بالنسبه للوضع المالي فهذا بالنسبه ليا اخر همومي و ما نحسش فيه يأثر لانه في النهايه الانسان بدينه و بأخلاقه و بشخصيته و طريقه تفكيره مش بسيارته و لا بحوشه و لا بموبايله يعني صدق المثل اللي يقول يا اخد القرد على ماله....الخ و الكلام هذا حتى هو مانقولش فيه من فراغ
الشكل فيه ناس سامحهم الله ناس سطحيين عندهم مقاييس عاليه و يطلبو في مواصفات اشخاص على التلفزيون زي المطربات و الممثلات و المطربين و الممثلين و ناسيين ان نصهم اذا كان مش اغلبهم في هالوقت هدا مش طبيعين و مشارط عمليات التجميل واخده فيهم حصه
يعني انسانه او انسان نقدر تتقبله في شكله و مع الوقت حتشوفه احسن واحد و هدا الكلام شنوووو؟؟؟ ايييوه مانقولش فيه من فراغ
مصادري طبعا تجارب مجموعه من الاصدقاء و الاقارب
يلا دمتم بألف خير

siraj said...

بصراحة كنت طامع انعلق الاول لكن النت تعبني واختنا نسوم ما كلينا امعاها كسرة ...حاولت نعطيها عين جت فيا ههههههه لكن خلاص انا سالت صديقي جمعة اللي في قصة قليل البخت علي عنوان الشايب اللي عطاه عين بالك نمشيلة اديرلي حل امعا نسيم ليبيا بالك نقدر انعلق الاول....وانت يا مذر لاند الموضوع حلو بس اللي عجبني رائي الشاب اللي اسمة سراج مشاء الله علية انسان مقنع بصراحة وحاذق وعندة نظرة مستقبلية اكيد الشاب هضا طويل لان ايشوف في المستقبل بوضوع واكيد وسيم لان شخصيتة من خلال كتاباتة حلوة فاكيد هو شاب وسيم.....هههههههههههههههههه

may said...

الموضوع حلو وفكرته احلى

والصراحة انى حرت من الافضل فى الرائى لنه كل واحد عنده نقطه عجبتنى فكون راى واحد من خلال الثلاثى المرح وهو

سراج في اختيار شريك الحياة...يكون هدفه في الزواج هو الزواج والاستقرار مع شريكه حياة تسعده ويكون الزواج خالي من المصالح والمطامع...جميل جدا المبدا



Motherland في اختيار شريك الحياة..نا من وجهة نظري أهم شي العقل والروح بس ماتكونش شينه طبعا...ههه لازم تكحلها فى الاخير زى عوايدك

عصام في اختيار شريك الحياة....يجب أن يكون هنالك تكافؤ مابين الزوجين من ناحية الحالة الاجتماعية والحالة المادية وكذلك الحالة العلمية. طبعا هناك حالات خاصة ...كلام فى غاية الروعة

لو تلقت هل الاراء كلها فى شخص واحد ويكون مقتنع بيها ...بلاهى قولولى بس وينه وبعدين يصير خير هههههههه

وخيتك ميوش

Super-Ego said...

Nasim libya...
فكرة نشر الموضوع فى مدونتين مختلفتين درناها هجوم مضاد عليكى بيش ماتكونيش الاولى فى التعليق لكن للاسف فشل الهجوم توا نفكرولك فى طريقة ثانية,بالنسبة لسراج صدقينى انا انشط منه انت عارفه الموضيع الى فى مدونته كلهم كتبتهم انا بس مسكين هو مايعرفش يكتب عطيتهن له يعنى عمل خير تقدرى تقولى ومابيتش نحكى ,عموما ماتقوليهاش لحد بيش مايضيعش الاجر.
Best regardS

Super-Ego said...

Meme ...
المطر ديما خير فى عالم الحقيقة وفى عالم الخيال ,,عالمنا,,,ونقولك موش من فراغ ياميمى كلامك جميل لكن بالنسبة لى كلامك منطقى يعنى كلام كتب انا نعتبره للناس الى يحبو يقرو ويحفظو ويطبقو يعنى مايفكروش ومايحاولوش يغيرو الواقع ...والمساوة فى المدينة الفاضلة بس, الى هى موش موجودة اصلا لدلك ينبغى نعترفو بالواقع ونعيشوه على حسب مانبو نحن موش المنطق وموش من فراغ كلامى من تجربة حقيقية بس نقدرو نقولو عليها خاصة جدا.

Best regardS

Super-Ego said...

sirag...

ياسراج ماتحاولش معاها نسيم بلكل, صقع من الاخر, الترتيب الاول مسجل باسمها لاينفع فيها لاعين لا ودن ..ممكن تجرب السحر, الوحيد الى ماجربناش ...وبعدين ياخوى اكيد طويل, انت سبقتنا وكتبت المواضيع متاع السنة الجاية افطن لروحك راهو تخش عالقرن الجديد ....

Best regardS

Super-Ego said...

May ...

اولا نحن موش ثلاثى مرح لكن جمعت بينا المصالح ,تى بالله عليكى توا سراج شكله شكل واحد مرح تى نكد وشياط ريق اربعة وعشرين ساعة ,,,,,وبعدين اين تكحيل يامى شنو تبينى ناخد وحدة شينة, نصيم ونفطر على بصلة لا والله كان موش اقل من كونداليزا رايس مايصير شى ,,,,وكيف صار ماعرفتيش, انا الاراء التلاتة اقتنعت بيهن توا بس انشالله عرفتي وينه الشخص الى تسالى عليه.

Best regardS

holyday said...

السلام عليك
هدا اول مرور واول تعليق نتمني تتقبله
كيف حال
زي ماقالت نسوم
شن نعود لعلقته غادي
بس
بصراحه
تسلمو علي موضوع
سلامي
اختك
فتاة من زمن اخر

holyday said...

السلام عليك
هدا اول مرور واول تعليق نتمني تتقبله
كيف حال
زي ماقالت نسوم
شن نعود لعلقته غادي
بس
بصراحه
تسلمو علي موضوع
سلامي
اختك
فتاة من زمن اخر

Gigi said...

السلام عليكم
احم احم :بصراحه هذا الموضوع من وجهة نظري يعني لازم يكون فيه تكافؤمن جميع النواحي والا راحت ليل
وانا نؤيد كلام الاخ عصام من ناحية التكبيد اللي نسميها خلطه الحبايب هذا يعني مانحكيلكش مرات يكون شين وفقير وهيا تشبح فيه أمير لا وجميل
يلا ربي يهدي هههههههههههه
لا واللي ماشي بين الشباب توا يقول ياحنه يبيها طويله وبيضاء وتخدم يحسابها ثلاجه عليك حاله وخلاص يعني
السمراء تموت هههههه
وبعدين الشخص بدينه وأخلاقه وأسلوبه وشخصيته وطبعا يكون متفهم ومش أناني ...........الخ
وتوا الواحد شنو بيقول غير ربي يحفظكم لبعض والاختلاف في الرأي لا يفسد للود قضيه دمتم في صحه وسلام
ولو سمحت يا ماذرلاند قول لسراج ردها عليا ان استطعت هذا وكان فهمني هههههههههههههههههه
أستودعكم الله

Super-Ego said...

holyday ...

وعليكم السلام ...نورتى ومشكورة على تعليقك بس نبو نعرفو رايك مرة اخرى...

Best regardS

Super-Ego said...

Gigi ....

اولا نرحب بيكى ثانيا عليش ربى يهدى لان شافاته امير,هو هضا الصح لان الانسان موش بشكله زى ماقلتى عموما فى تناقض فى كلامك..,وبالنسبة لسراج مانقدرش نقوله يرد عليكى لان الراجل مايردش على مرأة ,فمن توا راهو مايستطيعش ...عاوديها وخلينا نشوفوكى..

Best regardS

Unknown said...

الحق يا مذر لاند ضربني البخل وبنلجأ ل (الكوبي بيست) وهذا رايي زي ما نزلته في مدونة سراج.. بش نوضحلكم اني تابعت الموضوع في المدونتين..
--------

أني مقتنعة وبشدة.. بأن الزواج تفاهم وانسجام.. وطبعا تكافؤ..

وأهم حاجة الاحترام المتبادل..

وفعلا ننزعج جدا لما نشوف الطرق الغريبة يلي بدو الناس يتصرفو بيها مع موضوع مصيري زي هكي..

تو الشاب لما يقرر يتزوج يعطي المواصفات للعويلة..

متع الرام و الهارد دسك والبروسسور والفي جي اي.. وهمة ينطلقو يدوروله..

والله حدث ولا حرج علي المواقف البايخة..

مرة اني ماشية لبصريات المقريف نزلت في الساحة الخضراء.. وعلي كثر ما الدنيا خاشة بعضها صيانة معاش عرفت شارع المقريف.. وقفت بنية نسال فيها..
قالتلي اني ماشيتله توة نتسايرو..

دورة قعدت تقصقص فيا وبعدين خطبتني لخوها..
تو بالله هذا كلام...!
تخطب وحدة ماتعرفش اصلها شنو..

قصدي هي ماتعرفنيش بالك نطلع زعيمة عصابة..!
معقولة تجي خبط لزق.. وتخطب وحدة في الشارع..


المهم الحق..

هي قسمة ونصيب بس التفاهم.. وانك تعرف نفسك انت شنو.. وشن بالضبط محتاج من الطرف الثاني.. هو الاساس

خوي مدر لاند مع احترامي لوجهة نظرك..

لكن اني ضدها.. لازم يكون الارتباط بين الطرفين مبني علي الاحترام.. طبعا الاحترام لا يغني عن باقي الصفات.. لأن الاحترام بروحه بيخليها (دوام مدرسة) مش تفاعل وتفاهم ..
--
وربي يرزقكم كل واحد أميرة احلامه.. وللبنيات كل وحدة برنس الاحلام.._طبعا بصفاتهم ما جبدناش الفلوس مش تقولو برنس واميرة شكله الموضوع ماديات..



سراج وعصام نقطة لصالحكم P;

حنان شلبي said...

سلام بما انكم شركاء بالموضوع فمن حقك تاخد نسخة من التعليق

وطبعا شكر خاص الك عالموضوع لانو انا بمدونتك هلا
تحياتي الك
--------------
حقوق النسخ من حقي:

اول مرة الي هون بمدونتك وموضوعك حي وجد بوقت الذروة متل مبيقولو
قرات اراءكم
وكلامكم كلو منطقي ومقبول ومش مقبول يعني بلغة الادارة والتسويق
لولا اختلاف الاذواق لبارت السلع
وهاد مبدأ مهم بكل شي

بس الراي الوحيد الي ناسب افكاري ورايي هو راي motherland ومش قادرة اقلك هالشب اديشو ابن حلال لسة هلا هلا هلا حاضرة الفيلم تاع شلو هال ، وبصراحة رايي هو: مافي بنت مو حلوة ،في بنت بتعرف كيف اتبين حلاها
يعني في مثل بيقول : الحلو حلو لو صحي من النوم والوحش وحش لو غسل وجهو كل يوم
الحلاوة حلاوة النفس واكيد الحلاوة الخارجية مقدور عليها بس بدها قناعة من جوة النفس انو انا حلوة اذا انا ممكن اهتم بنفسي اذاااااا انا رح اعرف كون حلوة بعيون زوجي شو ماكان فيني

بغض النظر عن مقاييس الجمال عند الشباب والبنات ، النفس وما تعشق
يعني من الاخر فعلا الدين والاخلاق والتربية والروح الطيبة هي اهم شي بالبنت الي فيها تسعد اي شب لامد اطول من كم شهر يعني طول العمر

بس الشكل والمظهر ما فيهم يرضو اي شي الا لكم شهر وبسسسسسسسس

وبالنسبة للشب فعلا موضوع القوامة بزمنا هاد اشويتين اتدهور ، وان شاء الله بيكون في شباب قادرين لسه يطالبو بحقهم فيه ويرجعوه لحكمهم متل مربنا امر

هالموضوع كتييييييييير كبير وكتير فيه محاور للنقاش وكتير فيه نقاط بدها حكي ونقاش ولو بدي اكتب ما رح وفي ولا رح اعدل

بس بالاخر شي واحد لو اتمسكنا فيه فعلا بينحل هالموضوع
وهو كتاب الله وسنة رسوله منو رح بيعرف كل شب وكل فتاه شو الهم حقوق وشو عليهم واجبات

ومافي اخد من دون عطا

تحياتي الكم انتو التلاتة

زنوبيا الشهــيبي said...

السلام عليكم

عطر الله أوقاتكم بمسك من طيبة

فرصة كويسة ان لما ينقطع الكهرباء تتناقشوا
نا مثلا وفي الوقت الحالي مجرد ما ينقطع الضي نرقد لان ما عنديش مزاج اني نقرا على شمعة او مصبيح شحن
هكي هكي مستعارة
على كلا واجهات النظر تختلف وهذا الي مخلي في الحياة ميزة

قصدي لو اتفقن الاراء لماكنش في نقاش واسع وراهو الجو ملل ؟

رأي كطرف ثاني
لا أحبذ الي ما يكونش متعلم وهذه ورطة نمر بيها شخصيا فه الايام يعني في شخص تقدملي وممعاش شهادة بس عيب نعطي السبب هذا لان كسر الخواطر شين على الرغم من انه خلوق ومتحفظ بس من حقي نختار شخص متعلم وواعي للعلم الي بين ايدية مش معناها شهادة من المكان الفلاني وشايلها فوق راسه

والقيم والمبادئ حتى هنا ما يقلنش قيمة يعني برأي الانسان لما يكون عايش على مبدأ واضح ومرتب يبقى ماشي على الصراط المستقيم وهذا هو المطلوب لبني ادم

كلا المرجلة الزايدة ما نحبهاش ونفضل ان الشخص يكون شهم وفي فارق بينهن طبعا

بالنسبة للمادة
شخصيا نا قنوعة وحامدة ربي ليل نهار وراضية بالشي اللي يغنيني عن السؤال على الرغم من ان وضعي الاجتماعي فبيت اهلي طيب بس لو كان وضعي مع طرفي الاخر في المستقبل على قد الحال فهذا حيكون هو المطلوب
لان
متطلباتي في الشخصية او في شريك الحياة + المال مش حتكون موجودة

فحنرضى بالاهم والله يرزقك من يشاااااء بغير حساب
ويرزقنا من حيث لا نحتسب

وغير هذا كله

كل شي قسمة ونصيب

وربي الوحيد العالم بالغيب


أرق تحياتي

زنوبيا

Dr.butterfly said...

hi there motherland...!
i've read this post of your min zaman.. but i was just too busy to comment, sorry!!

anyways... i feel that your opinions are ver similar, and i do kinda agree with all of you... on the fact that you should take someone very close to your social and economic standards. but a little different won't harm!
the fact that your friend 3eesam says that a poor girl wants a rich man... welll... yes, maybe there are girls that think like that allthough i am against it, they think like that cause they want to have wat they want and they want to live mortaheen ... but that is not the standard... many who have done that sometimes don't live a happy life...!
sirag as well i have noticed that he says many of men set standards... i think that's ok, when the standards meet reality and meet what a man can handle, i say to thoes men ho put standards "i mean really high ones.. WHO ARE YOU?! and WHAT HAVE YOU TO OFFER?!" did they ever think of that... many want a perfect girl, but are they perfect themselves...(perfection is in god so, no one is perfect!)... ad i've noticed that sirage also has a view of the girl being beautiful...هههههه يعني خليك في المعقول يا أخي أنت مش عايش في روسيا راك في ليبيا في ليبيا في ليبياااااا
i'm not getting offended or anything... it's just that i ask... what is that supposed to mean?!?!?....
and as for your opinion, well yes!! i have seen the movie (shalow hal)... and well, what you were saying in the begining... taht the man is the impotant part...welll, i'm not going to disagree but i must say god asked him to get married to finish his half ad to finish his deen.... so, they are both important... and i think if that man can get everything undercontrole and has a good head on his shoulder then he deserves a good girl too... because she can help him when the tide gets high and he needs a helping hand and importantly she can know exactly what he is going through.... so my friend... not just him, even her!!

i think i have said alot... but to sum up my words i believe in faith and isteekhara... and i know if you ask god to send you the perfect one for you "that doesn't mean she's perfect, it's just that she's perfect for you" and ofcourse you've been a good muslim... allah won't hesitate to answer your prayers....!!! :)

and i wish you all a happy life, and a happy wife ;)
allah yis3dkom with the most amaizing women that suits each and every one of you...! a simple sister prayer to all of you out there...and remember good things happen to good people... :))

sallam!

Dr.butterfly said...

of i forgot to mention... personality is the most important thing in the other person (man/women)... she doesn't have to be (nice, kind, genourse, good, pleasing, quite, talkative, funny, seriouse...ect)..she just has to suit yours...!
and in marrige, the important thing is understanding and appriciation...!

take care...sallam!!!

Dr.butterfly said...
This comment has been removed by the author.
Dr.butterfly said...

i posted twice the same comment so i deleted one....hehe!!